Ahavuye isanamu, Women Deliver/Twitter
Ku mugoroba wo kuri uyu wa mbere i Kigali mu Rwanda hatangiye inama mpuzamahanga y'ubukangurambaga ku buringanire bw'abagore n'abagabo no ku buzima n'uburenganzira bw'abakobwa n'abagore.
Iyi nama izwi nka Women Deliver 2023 (WD2023), abayiteguye bavuga ko yitabirwa n'abantu bagera ku 6,000 baba bahibereye, mu gihe abandi barenga 200,000 bayitabira mu buryo bw'ikoranabuhanga ry'iyakure.
Ni iya mbere ibereye ku mugabane w'Afurika, ikaba n'iya gatandatu ibaye ku rwego rw'isi kuva iya mbere yabera i London mu Bwongereza mu 2007.
Urubuga rwa internet rw'iyi nama ruriho ko iyi nama ari uburyo bw'ingenzi bwo gusuzuma ibyakozwe nyuma y'ibyiyemejwe byinshi mu buringanire mu nzego zo ku isi zirimo nk'umuryango w'abibumbye, inama y'uburezi ku isi, inama y'ibihugu bikize ya G7 n'inama ku ihindagurika ry'ikirere.
WD2023 ivuga ko iri mu mwanya mwiza wo gutuma ibyiyemezwa mu myaka itaha "bivamo gahunda y'impinduka mu buringanire".
Iyi nama, izarangira ku wa kane w'iki cyumweru, yitabiriwe n'abategetsi bo mu nzego zitandukanye nka politiki, abo mu rwego rw'abikorera, imiryango itari iya leta, ibigo mpuzamahanga, imiryango iharanira uburenganzira bw'abagore, urubyiruko n'imiryango iharanira uburenganzira bw'abahuza ibitsina b'igitsina kimwe.
Bamwe mu bitabiriye iyi nama barimo nka Malala Yousafzai, impirimbanyi iharanira uburezi bw'abakobwa, mu 2014 yatsindiye igihembo cy'amahoro cyitiriwe Nobel – ubwo yari afite imyaka 17, umuyobozi nshingwabikorwa w'ishami rya ONU riharanira uburinganire no guteza imbere abagore (UN Women), Simas Bahous, na Minisitiri w'iterambere mpuzamahanga wa Canada Harjit Sajjan.
Abateguye inama bavuga ko iyi "izibanda cyane ku bufatanye kurusha mu kindi gihe cyabayeho hubakwa amateme [ubuhuza] hagati y'abafatanyabikorwa batandukanye".
© 2023 BBC. BBC ntibazwa ibivuye ku zindi mbuga. Soma ibijanye n'aho duhagaze ku mihora ijana ahandi

source