Ahavuye isanamu, Hilda Baci
Hilda Baci asanzwe ari umutetsi w’umwuga kandi uzwi cyane muri Nigeria
Kuva kuwa kane ushize ari mu gikoni atetse, muri iki gitondo yatangaje ko yamaze guca umuhigo w’isi wo kumara umwanya munini atetse ndetse akomeje ngo ashyiremo igihe kinini.
Ku mbuga nkoranyambaga muri Nigeria, Hilda Effiong Bassey bita kandi Hilda Baci niwe wiganje, amagambo nka 'Go Hilda' cyangwa 'Rooting for Hilda Baci' aherekejwe n’amafoto na video bimugaragaza birimo gucicikana cyane kuri Twitter no ku zindi mbuga nkoranyambaga.
Hilda ashobora kwandikwa mu gitabo cya Guiness World Records, nyuma y’uko muri iki gitondo yarengeje amasaha 87 n’iminota 50 ari mu gikoni atetse.
Guiness World Records cyatangaje ko "ikeneye kureba ibihamya byose mbere yo kwemeza uyu muhigo" wa Hilda.
Umuhigo Hilda yari agamije gukuraho ni uw’umutetsi w’umuhinde Lata Tondon wamaze amasaha 87 n’iminota 45 mu gikoni atetse, hari mu 2019.
Hilda aherutse gutangaza ko yumva yizeye kandi ashobora guca umuhigo wa Lata, biravugwa ko ubu agamije kugera ku masaha 96 agitetse.
Yatangiye kuwa kane saa kumi zuzuye ku isaha y’i Lagos ubwo yari acanye ‘cooker’ ye, muri weekend abantu benshi barimo n’ibyamamare muri Nigeria bagiye guhagarara imbere y’igikoni barimo kumutera imbaraga.
Hilda Baci asanzwe ari umutetsi w’umwuga kandi uzwi cyane muri Nigeria.
Ni umugore w’imyaka 27, ni umunyanigeria wavukiye muri Ghana, nk’uko ibinyamakuru muri Nigeria bibivuga.
Asanzwe ari umushoramari mu byo guteka, umukinnyi wa filimi n’ukora ibiganiro kuri televiziyo ku bijyanye no guteka. Yashinze restaurant yitwa "My Food by Hilda".
Avuga ko ibijyanye no gukunda guteka n’ubuhanga mu kubikora abikomora kuri nyina. Hilda avuga ko yumva ko buri muntu wese akwiye kubona ifunguro ritetse neza. Mu gihe cya Covid-19 yaratekaga agashyira abatishoboye, avuga ko yagaburiye abarenga 3,000.
Yigishije guteka kandi abanyeshuri barenga 2,500 nk’uko abivuga.
Abantu benshi baje kumushyigikira muri iki gikorwa.
Avuga ko mu 2018 aribwo yagize igitekerezo cyo guca uyu muhigo, nk’uko BBC ishami ry’ururimi rwa Pidgin ibivuga.
Kumara iminsi ine mu bushyuhe bwo mu gikoni kandi utetse ni igikorwa gisaba imbagara z’umubiri ariko cyane cyane n’izo mu mutwe. Ibyo Hilda avuga ko umugore ashoboye.
Mu bikorwa byo guca umuhigo w’amasaha menshi, ababikora bahabwa umwanya muto ubarirwa mu minota wo kuruhuka gato, aho bashobora nko kwitunganya kumusarane.
Ahavuye isanamu, Hilda Baci
Amaze iminsi ine ari mu gikoni atetse
Hilda avuga ko yamaze igihe kinini yitoza ndetse yatakaje ibiro byinshi ku mubiri mu kwitegura kugerageza uyu muhigo.
Hilda yabwiye BBC Pidgin ati: “Kugerageza ibi ni igihamya cy'imbaraga z'ibyo abakiri bato bashobora bahawe umwanya n'ubufasha."
Avuga kandi ko agamije guha urugero abakobwa bakiri bato ngo babone imbaraga z’ibyo umugore ashobora gukora.
Ibiryo amaze iyi minsi ateka avuga ko abiha abantu bari hafi bakabyirira kandi ku buntu.
© 2023 BBC. BBC ntibazwa ibivuye ku zindi mbuga. Soma ibijanye n'aho duhagaze ku mihora ijana ahandi

source